泰國五天購物之旅

十二月十九日晚乘坐 Emirates EK385 九點半去 Bangkok，去到機場 checkin，原來要用番網上訂票張Visa咭checkin,點知Brenda竟然冇帶，大劑！春哥雙眼嚇到跌左落地，好彩仲有個半小時，即刻 Call 亞仔，叫佢飛的帶張AE Visa到機場，真係驚險。

十一點幾到曼谷，入住Ibis Sathron, 近 Suan Lum Night Bazaar，價錢950匹一晚(no breakfast included)，因為新開張，地方好整齊清潔，唔錯。放低行李之後，去左對面一間舊式酒店，叫咗一座三公升啤酒筒，超平（299匹一筒），我地四條友傾計，又飲又食，玩到兩點幾先番酒店休息。

第二朝一早起身飛Taxi去 Chatuchak Market，20分鐘到達，十分方便。食完早餐便開始購物，第一站買左一批特色番皂，民族飾物。又同買飾物的老闆娘合照，佢樣貌有幾分似嘉嘉阿媽，好玩得,最後重送咗個稍基比我哋。第二站幫豪哥買 Pink Floyd T-shirt及民族服裝，第三站買木貓及泰式拖鞋。行到四點幾先搭的返酒店，行足一日，勁呀 !!!! 放低所有貨返酒店之後，即刻打的去MBK，
春哥買左件特價 Addidas 運動衫，平過 Central Shopping Mall，我買左架遙控直升機，Kawa 兩女又買左一批腳鏈，一D木製貓仔。最後喺 Sukishi BBQ 食日式燒烤，好正 !

跟住撘的去 HealthLand 做左兩小時泰式全身按摩，比啲技師接埋咁劑 !不過超爽呀!但係咁嘅情況下我同阿春哥竟然可以大奏交響樂，笑死人 !!!!!!，然後番酒店，又再去對面間酒店食消夜,乘機上網。

第三天，Ibis 酒店有專人載我地去 Silom BTS 搭 Skytrain，抵讚。喺 Silom 食魚蛋粉做早餐，然後搭的士去Platinum入貨,喺急步下都買到的嘢,兩個女人仔都好識做,衝完一輪首先就陪我哋去新大黑食lunch，然後去 Central Shopping Mall 行街街,掂知比佢哋個 Discount plan 玩殘咗,買到停唔到手，大pan，流血不止!!!!!!滿載而歸返酒店旋即飛的去建興食春哥至爱(海鮮餐)，yummy !!!!!! Of course 再去 HealthLand 啦，今次 Brenda 做 oil Message，我哋就腳底按摩，舒服到瞓著咗!!!!!!馬不停蹄，去咗 Night Bazzar shopping，買咗少少嘢之後返酒店食水果消夜。

第四天，早上同春哥兩公婆去對面間Malaysia Hotel食完早餐,影下相，送別春哥之後就打的去Central Chitlom 搞返VAT單嘢，因為琴晚發現少咗張單可能留喺 information 道，可惜我地最後都係搵唔番D單，無功而退。不過，我地又忍唔住減價嘅威力，買左七千幾匹，又比佢個plan玩殘多一次。行去 Siam Center, 諗住去 Lee's Kitchen 嘗試佢哋至正「 沙冰椰青」，點知間舖都唔見埋，跟住就去 Siam Square 行街，去食左個海南雞飯+魚蛋米,味道ok，再去船屋食豬雜米粉, 但 no good!!!!。之後就撘的士再去 Platinum Fashion Mall。點知一時失策，瞓着左，比個的士佬車左去 Victory Monument，浪費左成個鐘。喺 Platinum 行左一陣，換左1000港幣，又買咗好多飾物，lunch 係food court 食左個魚趐，150匹好平，味道都Ok。之後去Central World 買左幾個 Naraya 布袋，跟住去咗一間叫 Shabushi 食 shabu shabu buffet，299匹一位,見到好多人排隊，冇死啦!!，不過超唔掂，簡直係垃圾。食完飯，去HealthLand做腳底按摩，比錢時先發覺剩返幾草,拿拿林行去Citibank攞錢,跟住返回酒店，收拾行裝，pack 咗一個喼，兩個大黑袋，一個背囊同一件 handcarry! 勁呀!!!

最後一天，早上Check out 之後就打的去機場，搞VAT退稅,又要蓋章, 之後去 S&P 食蝦飯，見到Lee's Café又再衝入去食椰青沙冰，yummy !!!!! 過關的時候好驚隻遙控直升機唔比過，最後都順利過關，去到入閘先可以攞返的退稅，重要收100匹手續費，退得雞碎咁多,手續煩複。

完成四天旅程，如果玩多一日就 Perfect 啦 !!!! Thailand，I will be back!!!!!!!!!!!!!!!!

大坳門風箏及海鮮餐之旅

各位Kawa Fun Club 會員，因為各會頭事務繁忙，流水響一役之後成個月都冇搞過任何活動。聖誕將近，係時候開始安排戶外活動。跟「威威」會頭討論之後，提議搞番次「大澳門(大坳門)風箏及海鮮餐之旅」，日期定於十二月二十八日。如各位會員有其他提議，無任歡迎！

行程；

• 早上十時集合，食早餐，然後出發
• 十一時左右到將軍澳買紙鳶
• 十二時到大拗門
• 十二時至二時自由活動（放紙鳶，放遙控飛機，攀石，拍照..等等）
• 二時至三時下午茶小食
• 三點至六點自由活動（欣賞海景及日落）
• 六點離開大拗門，前往布袋澳
• 七點晚飯於發記海鮮飯店
• 九點返家

聽講喺將軍澳坑口新寶城樓下洗衣店有紙鳶賣，圖案多，價錢又平。又或者去到清水灣郊野公園內的小食亭亦有紙鳶賣。

粉嶺流水響 - 鶴藪 BBQ

今次由「春春」會頭做發起人搞「秋季BBQ」活動順利舉行，雖然參加人數得七位，不過冇所謂啦，大有大搞，細有細搞，最緊要大家玩得開心，希望下次可以有細路同其他家族參與。

本來去新娘潭燒嘢食，最後改為去位於粉嶺流水響之鶴藪。原來喺十幾年前我地曾經去過流水響野餐，威威同我都有D印象，十幾年後又舊地重遊，時間過得真係快。

今次威威冇帶相機，我地可以瘋狂咁影。請大家click 入下面張相去欣賞所有相片，多謝各位會員溜覽

流水響 - 鶴藪

大尾篤單車遊

唔好意思，今日先將大尾篤的單車相擺上網，你地知威威又忙，小弟又忙，我部電腦又番左廠維修，所以今日趁假期先得閑攪，請見諒！

寄件者 20081026 - 大尾篤單車遊

十一月份生日晚宴

Hi 各家族成員,

桃桃是今個月之星,請問各位邊晚有空出席晚宴呀!!

5,6,7 號晚8點後都得架!!

WaWa :-)

秋季BBQ

上月中之大搞作,因各人事忙,未能進行,現在延續大搞作,本月9號或30號,請各位選擇日期,舉辦燒烤大活動,地點稍後決定!

桌球

今日約埋呀豪哥走上南華會打保齡，之後仲走去打埋桌球，咁耐冇打，生疏晒。振嵐就超勁，一局打出超100分，不過係負數。

報名

本星期日（十月二十六日）即將舉辦之單車同樂日現在開始接受報名。

參加者

____

威威（confirm)
豪哥（confirm）
春哥（confirm）
碩鋒（confirm）
山山（confirm)
振嵐（confirm）
嘉嘉（confirm）
贊文（confirm）
俊凌一家三口（confirm）
狄奇（confirm）

今次踩單車活動，出發地點「大埔」，終點「大尾篤」。 暫定早上十一時大埔墟火車站集合，然後 到市中心租車。途經大埔海濱公園，大埔工業邨，汀角路及船灣海，最後到達大尾篤船灣淡水湖主壩，全程大約一小時。

東區自然步道

今朝神咁早起左身，不如同威威行山放狗。早餐後，由鰂魚涌東區自然徑開始，途經「紅磗屋」，大約行兩公里便回程趕下一場「羽毛球」。

測試

威威兄


我今晨幫你測試完。結論係，你用$85大洋買果條IDE轉USB Adaptor 係有問題，不能正確認出隻Seagate硬碟。我用另外一條$35大洋IDE 轉USB Adaptor 完全冇問題。再試用另外一條Mini-USB cable （用於MTV3000）試仍然出現問題，建議將產品退回店舖更換。

事項測試連工包料收費$200，請立即付款。

欠債還錢

本人於十月一日至四日代買之港龍機票已經過數。 黃小炳，張威威，陳小春等人，如果唔想門口噴上紅漆， 見字還錢！

黃小炳欠$2285
張威威欠$4570
陳小春欠$4570

變賣家產

呢幾日股市大跌，身家唔見一大截。尋晚心血來潮，不如變賣部份家產幫補家計，最後將部好耐都冇用嘅 Minolta DiMAGE A1 同埋部 Panasonic Lumix LX2 擺上Yahoo 拍賣。希望可以賣度 $1200蚊 及 $1400 蚊。

下晝去左灣仔298問價，真吹脹，部 A1 竟然只係出價800個大洋。

Kawa Fun Club - 第二次活動

跟 Louis 兄商量之後，決定第二次活動於十月二十六日如期舉行。今次活動為踩單車，出發地點「大埔」，終點「大尾篤」。 暫定早上十一時大埔火車站集合，然後 到市中心租車。途經大埔海濱公園，大埔工業邨，汀角路及船灣海，最後到達大尾篤船灣淡水湖主壩，全程大約一小時。

Kawa 新店開張

Kawa 新店開張

經過兩年艱苦經營，Kawa 終於能夠打破悶局，開展新業。由一間狹窄的小店舖 (4 呎 X 8 呎) 搬去一間有 6呎 X 10呎的店舖，總面積差不多比以前多一倍，不過租金只係貴左小小。

開張當日，得到各方好友及熟客到訪。希望各位以後繼續支持Kawa業務發展，多多幫襯。最後多謝電工明，雜工山，揸流灘及木工成的幫手，不用兩天時間就攪掂個店舖。


如果有興趣觀賞當日盛況，請 click 入我們的網上相簿。

股市

股市

今日股市風高浪急，一開市就唔見左1300點，好誇張。再check下隻1800中交建(想買好耐)，竟然跌左超過一成，跌淨4.87，比最高價25蚊跌超過8成。以鐵路基建股來講，跌得太過份。既然如此，不如做白武士，出手相救。落盤果陣，諗住入四手，點知熬底縮沙，落得兩手(2000股@4.87）。收市都升番上5.17，總算有個交代。

發條橙

今日食完午飯之後，走左去東方188行，比我發現一隻我好想好想重溫嘅舊戲 - 發條橙(二手藍光影碟)，即時科水，承惠$158大洋。呢套戲喺70年代上演（當時我好似讀緊中四或者中五），喺當時全港最正由一代電影宗師「史丹力寇比力克 Stanley Kubrick」導演於1971年所拍題材十分大膽，並非一般娛樂片，畫面構圖，劇力迫人，情節，人物，故事都是一流。暴力場面配以古典樂章，可稱得上Kubrick最巔峰驚世之作。

行山（香港仔水塘至灣仔硤）

2008年10月7日

尋日係 Kawa Fun Club 第一次舉辦康樂活動，冇足夠時間安排，差一些流會，要跪求各家庭成員。

最後才得到 Amy，振嵐，嘉嘉，贊文 及 Chao Chao 的支持，活動最終順利 舉行。

好彩天氣唔錯，威威又鬼咁好人，揸架七人車到西灣河太興同我地一齊食早餐。

之後載晒我地成斑人由西灣河去到薄扶林花園接埋 Chao Chao。

可惜Portia同豪哥都冇出席今次活動去支持威威。