Kawa Fun Club: 2009

4月4日

上午十時赤立角機場出發，下午三時半到達成田機場，出海關之後，第一時間去買「東京地下鐵二日卷」980yen x 3及Suica&N'EX 優惠卷 3500yen x 3。然後乘坐 16：48班次往新宿，約18：30到達新宿Citadines Apart'Hotel，間酒店剛剛開幕，做緊半價優惠，由15000yen減至7600yen，真係超值，酒店好精緻，設計又簡潔整齊，充滿歐陸品味。房間面積頗寬敞，一張五呎雙人床加一張4呎闊Sofa床，有書檯，32吋LCDTV，開放式廚房，廁所仲有一個四呎浴缸。登記入住之後，乘公共巴士(200yen x 3) 往新宿車站西口，行至電器街，光顧一間頗為出名嘅回轉壽司「北澤俱樂部」，價錢一點都不便宜，埋單3900yen。晚飯後，就在電器街Shopping，雖然有不少新產品，不過大部份價錢比香港貴。新宿附近。店舖林立，我們便由新宿步行返回酒店。返回酒店後，大家一起玩大D，振嵐提出要睹50yen一隻，最後佢輸左超過5000yen比我，之後仲唔認數，輸打贏要。

4月五日

早上9：30am出發，乘巴士往新宿站(200yen x 3 好貴），再轉乘JR 中央線往「吉祥寺」（210yen x 3)。15分鐘後便到達吉祥寺，然後由北口方面往「Satou牛肉店」排隊，要排成十幾分鐘先買到炸免治牛肉140yen x 5及特製燒豬肉，不過D炸免治牛肉真係好好好食，外面金黃色的吉列脆皮，入面D洋蔥加上松板牛肉嘅肉汁，熱辣辣，牛肉味香濃。跟住喺附近行街睇野，D衫都冇乜特別，價錢又唔係平。之後去「井之頭恩賜公園」櫻睇花，好多人，原來D日本人男女老幼好鐘意睇花，成個公園都堆滿日本人，行左大約一個鐘便離開公園前往「三鷹美術館」睇天空之城的機械人及龍貓，行差不多40分鐘到達美術館，竟然所有今日入場卷已經售完，原來入館門票要預先購買，令我們白走一場，唯有帶着失望心情下去下一站「自由之丘」。

下午三時左右到達「自由之丘」，其實都係一般步行街，好多細小咖啡室，店舖，賣服裝，精品，飾物等等，冇乜特別。行到六點左右便乘坐JR 返回涉谷，喺涉谷行左一陣之後，去「Pepper Lunch 」食牛肉鐵板燒，好味。今晚食完晚飯之後，大家都好累，所以早點返回酒店，明天繼續。

4月6日

九點半開始出發，乘坐地下鐵往「後樂園」玩瘋狂「Thunder Dophine」過山車，今次架過山車冇360度大迴轉，架過山車圍繞「Dome City 」而建造，有接近90度垂直俯衝，又穿越大廈外牆，再穿過摩天輪，十分刺激好玩。

之後去食「一蘭」拉麵，好搞野，好似探監咁，喺售票機買票後，行入一個包廂，寫下你想要的製作方法，按掣後便有人從你的窗口取走訂單，一分鐘後便有人從窗口遞上熱辣辣的拉麵，整個過程你只是見到服務員雙手。

行完附近商場後便乘坐地下鐵往新橋站再轉乘單軌電車（310 yen x 3）到台場，到台場後立即前往玩肋肉擂台，買左一份套票（3900 yen），不過玩落真係不外如事，浪費金錢。玩完之後，行商場，影相，去豐田展覽館，睇摩天輪，玩遊戲機。

晚上七點左右返回新宿食晚飯。去到新宿「歌舞技丁街」想食燒牛肉，搵唔度，唯有去試下「甘太郎」，食物普普通通，飲品勁貴，埋單5,604Yen，破產啦！

4月7日

今日一早七點起床出發去築地市場，乘坐丸乂內線往銀座轉車往築地，本來以為築地市場入面好多賣海鮮的檔囗，原來大部份地方都係上落貨用，只有小部份係壽司店舖，D壽司店好細間，最多坐十幾人，光顧嘅客人又多，D人龍排到打晒蛇餅。我地搵左間比較少人，都要排成十五分鐘，食完仲搞到肚痛。跟住去上野睇運動鞋及糖果，鞋就買唔倒，只係買D糖果做手信。最後去「秋葉原」行街，睇電玩，影音，電腦，買罐頭麵.....等等。行完街買完野，就去食Shabu-Shabu 放題，埋單要一萬yen，點知間餐廳當我和振嵐係小童計，總數收我地7千幾yen。返回酒店先發現漏底左一袋物品（總值1700 Yen)喺餐廳，死未，報應咯。

4月8日

今日十點出發去位於東京郊區的Mitsui Outlet Park，，喺吉野家食完早餐，由酒店行差不多20分鐘去到新宿西武站，乘坐去「本川越」急行至「所氵尺」轉車往「入間市」，到「入間市」之後已經十二點半，再轉巴士先到達Mitsui Outlet Park，入面有成二百間Shop，分上下兩層，跟美國嘅Outlet 差不多，地方好大，我地先喺上層行左兩個幾鐘，食完宴再行，五點先行完上層，跟住再戰下層，行到七
點半先離開，回程又喺入間市行左一個鐘，九點先坐車返新宿，將近十點先到達新宿西武站，隨隨便便搵左間「博多天神」食拉麵，呢間拉麵原來可以免費添加拉麵。

4月9日

今日又係遲起床，十點出發去「原宿 - 竹下通」，「竹下通」- 日本潮人購物熱點，賣一些比較平價衣服，大概行左約三個多小時，老婆便先返回酒店，振嵐跟我一起再戰電車男聖地「秋葉原」，兩條友去左食回轉壽司，然後振嵐去睇中古PS3 Game 碟，睇到流晒口水，眼金金，最後買左隻高達無雙2，我就只係買左20隻DVD+R DL，行到七點幾回歸搵老婆食晚飯，跟住去搵左間日式「七輪燒肉」，叫左五碟牛肉，每碟得果幾件牛肉，到喉唔到肺。

4月10日

最後一天，八點起床，老婆整早餐，食完就Check Out。去「高島屋」入面間 Tokyu Hand行左個幾鐘就返回酒店攞行李，急急腳去搭地下鐵去機場，去到國泰Check-in counter，果位地勤話我Join 左Marco Polo Club 十週年將我及其中一位Guest升級上商務客位，振嵐搶住要upgrade，唯有委屈下老婆，大約八點半就返回香港，七天日本之旅就此完結。